Chevron Corporation (Шеврон Корпорэйшн)
Шеврон Корпорэйшн» компаниясының логотип
Дереккөз: Шеврон Корпорэйшн» компаниясының сайты
Chevron Corporation («Шеврон Корпорэйшн») – АҚШ пен әлемдегі ең ірі интеграцияланған энергетикалық компаниялардың бірі.
1879 жылы Pacific Coast Oil Company атымен құрылған компания мұнай бизнесінің барлық кезеңдерімен: мұнай мен газды барлаумен, өндірумен, өңдеумен, тасымалдаумен және өткізумен айналысады. Бас кеңсесі Сан-Рамон, Калифорния, АҚШ-та орналасқан. Компания АҚШ, Канада, Австралия, Қазақстан, Нигерия және басқа да 180-нен астам елде жұмыс істейді.
2024 жылы компания пайда деңгейі бойынша Forbes тізімінде 25-орынды иеленді.
«Шеврон» компаниясы КСРО ыдырағаннан кейін Қазақстанда мұнай өндіру мен барлауда негізгі рөл атқарды. Оның қатысуы 1980 жылдардың соңында, 1988 жылы КСРО Мұнай өнеркәсібі министрлігі мен «Шеврон» Теңіз кен орнын игеру үшін бірлескен кәсіпорын құру ниеті туралы хаттамаға қол қойған кезде басталды. Алайда іс жүзінде іске асыру Кеңес Одағы ыдырағаннан кейін, Қазақстан тәуелсіз мемлекетке айналып, өзінің табиғи ресурстарын бақылауға алғаннан кейін басталды.
1993 жылы Алматыда Қазақстан үкіметі мен «Шеврон Корпорэйшн» арасында Теңіз және Король кен орындарын игеру үшін «Теңізшевройл» бірлескен кәсіпорнын құру туралы тарихи келісімге қол қойылды. Бұл келісім «ғасыр келісімшарты» деп аталды және тәуелсіз Қазақстандағы алғашқы ірі халықаралық мұнай келісімі болды. Келіссөздерде Қазақстан Тұңғыш Президент Нұрсұлтан Назарбаевтың басшылығымен тиімді шарттарға қол жеткізді, соның ішінде Chevron компаниясының табыстағы үлесі бастапқыда жоспарланған 35% емес, 19% мөлшерінде белгіленді.
«Шеврон Корпорэйшн» 20 жыл ішінде Қазақстанға 20 миллиард долларға жуық инвестиция салды, ал Қазақстан салық және басқа да төлемдер түрінде 77 миллиард долларға жуық қаржы алды. Компания еліміздің мұнай-газ саласындағы ірі шетелдік инвесторға айналды және Теңіз және Қарашығанақ сияқты ірі кен орындарында едәуір үлеске ие. Теңізшевройл Қазақстанда өндірілетін барлық мұнайдың шамамен 34% -ын қамтамасыз етеді, ал Қарашығанақ кен орны әлемдегі ең ірі газ конденсатты кен орындарының бірі, онда «Шеврон Корпорэйшн» осы жобаны басқаратын консорциумда 18% үлеске ие.
Дереккөздер: