Ху Цзиньтао (1942 жылы туған)
Ху Цзиньтао 1942 жылы Шығыс Қытайдағы Аньхой провинциясының Цзиси уезінде дүниеге келген. Ресми өмірбаянына сәйкес, оның ата-анасы шаруалар болған. Басқа нұсқа бойынша, оның әкесі шай өндірісімен айналысқан және елдегі «мәдени революция» (Қытай Халық Республикасының төрағасы Мао Цзэдунның елдегі «капитализмді қалпына келтірудің» алдын алуға бағытталған идеялық-саяси науқаны) кезінде қаза тапқан.
Ху Цзиньтао
Источник: Wikimedia Commons
1964 жылы ол Бейжіңдегі беделді Цинхуа университетін бітіріп, гидроэлектр станцияларын жобалау инженері дипломын алып, сол жоғары оқу орнының аспирантурасына оқуға түседі. Сол жылы Қытай Коммунистік партиясына (ҚКП) мүше болып кірді және өз факультетіндегі партия ұяшығын басқарды.
1968 жылы, «мәдени революция» басталғаннан кейін, ол «буржуазиялық шығу тегі» үшін айыпталып, кедей Ганьсу провинциясына (Батыс Қытай) «еңбекпен қайта тәрбиелеуге» жіберілді. 1968–1974 жылдары Су шаруашылығы және электр энергетикасы министрлігінің Люцзя инженерлік басқармасының құрылыс бригадасында жалпы жұмысшы, кейін Люцзяся гидротехникалық басқармасында инженер болып жұмыс істейді, техникалық жұмысты ведомствоның партия ұяшығы хатшысының орынбасары қызметімен қатар атқарады.
1974 жылы Ганьсу провинциясындағы Қытай Коммунистік Жастар Одағының (ҚКЖО) комитетінде жұмыс істей бастайды. Сонымен қатар, Ганьсу провинциялық үкіметінің құрылыс басқармасында еңбек етеді, жобалау бөлімінің хатшысы, кейіннен директор орынбасары және басқарма басшысының орынбасары қызметтерін атқарады.
1970-ші жылдардың соңында ол 1980-ші жылдары Мемлекеттік кеңестің құрамына кірген Ганьсудегі ҚКП комитетінің хатшысы Сун Пиннің назарын өзіне аударады. Оның ұсынысы бойынша 1981 жылы Бейжіңдегі ҚКП Орталық Комитеті (ОК) жанындағы Орталық партия мектебіне оқуға түсті. 1982 жылы Бейжіңге ауыстырылады, Қытай Коммунистік Жастар Одағының (ҚКЖО) хатшылығында қызметке ие болады, 1984 жылдан бастап ұйымның бірінші хатшысы және Пионер отрядтары Жұмыс комитетінің (Қытай Коммунистік Жастар Одағы қарайтын балалар ұйымы) төрағасы болды. Сондай-ақ Бүкілқытайлық жастар федерациясын басқарады.
1985–1988 жылдары ҚКП ОК құрамына кірді, Гуйчжоу провинциясындағы ҚКП провинциялық комитетінің хатшысы және Гуйчжоу әскери округінің партия комитетінің бірінші хатшысы болды. Провинциялық деңгейдегі ең жас басшы атанады. Өзіне сеніп тапсырылған аймақтың экономикасын қалпына келтіруге бағытталған нарықтық реформаларды жүргізді.
1988 жылы Тибет автономиялық аймағының партия комитетінің хатшысы және Тибет әскери округінің партия комитетінің бірінші хатшысы қызметін алды, алайда биік таулы климатқа бейімделу қиындығына байланысты аймақты басқарудың көп уақытын Бейжіңнен жүргізді. 1989 жылы Тибеттегі қытайға қарсы көңіл-күйдің өршуінен туындаған жаппай тәртіпсіздіктер кезінде демонстрацияға шыққандарға қарсы көзден жас ағызатын газбен жауынгерлік патрондарды қолдануға рұқсат берді. Нәтижесінде көтеріліс басылды.
1992 жылы Бейжіңге оралып, ҚКП ОК Хатшылығының құрамына кірді, сондай-ақ ҚКП ОК Саяси бюросы Тұрақты комитетінің мүшесі атанды. 1998 жылдың наурызында Қытай Халық Республикасы Төрағасының орынбасары болып сайланды, ал 1999 жылы елдің қарулы күштерін бақылайтын партиялық орган – ҚКП Орталық Әскери Кеңесі төрағасының орынбасары болып тағайындалды. 1993 жылдан 2002 жылға дейін Орталық партия мектебінің ректоры болады.
2002 жылдың қарашасында ҚКП ОК Бас хатшысы болып сайланды. Бұл қызметті Мао Цзэдун атқарған 1949 жылдан бергі ең жас партия басшысы атанды. 2003 жылдың наурызында ҚХР Төрағасы болды. Мемлекет басшысы ретінде елде мемлекеттік капитализмді құру бағытын ұстанды. Экономиканы мемлекеттік реттеу сақталды, бірақ кәсіпкерлік бастама ынталандырылды, кәсіпорындардың шаруашылық қызметіне бақылау азайтылды. Нәтижесінде, 2003–2012 жылдары елдегі жалпы ішкі өнімнің (ЖІӨ, елде өндірілген барлық тауарлар мен қызметтердің нарықтық құны) орташа өсу көрсеткіші 10,6%-ды құрады. 2011 жылы ҚХР экономикасы әлемдегі көлемі бойынша екінші орынға шықты.
Ху Цзиньтао Қазақстанмен және елдің көшбасшысы – Президент Нұрсұлтан Назарбаевпен қарым-қатынасқа ерекше мән берді. 2008 жылы ҚХР-да тұңғыш рет Олимпиада ойындары өтті. Қазақстанның биік таулы «Медеу» мұз айдынында «Бейжің-2008» олимпиада алауы эстафетасының әлемдік айналма кезеңіне бастау берген бірінші алау ұстаушы Қазақстан Республикасының Тұңғыш Президенті Нұрсұлтан Назарбаев болды.
Қазақстан Республикасының Президенті Нұрсұлтан Назарбаев Алматыдағы «Медеу» биік таулы мұз айдынында өткен «Бейжің-2008» Олимпиада алауының халықаралық айналма эстафетасын ашу салтанатына қатысты. Бұл оқиға 2008 жылдың 2 сәуірінде болды
Дереккөз: Қазақстан Республикасының Тұңғыш Президенті Нұрсұлтан Назарбаевтың қызмет хроникасы
2008 жылдың тамызында өткен Бейжің Олимпиадасының ашылу салтанатында Нұрсұлтан Назарбаев Ху Цзиньтаоның жеке қабылдауына ие болған әлемнің үш көшбасшысының бірі болды.
Қазақстан Республикасының Президенті Нұрсұлтан Назарбаев Бейжің Олимпиадасының ашылу салтанатына барған сапары аясында Қытай Халық Республикасының Төрағасы Ху Цзиньтаомен кездесті. Кездесу 2008 жылдың 7 тамызында өтті
Дереккөз: Қазақстан Республикасының Тұңғыш Президенті Нұрсұлтан Назарбаевтың қызмет хроникасы
2012 жылы Ху Цзиньтао ҚКП ОК Бас хатшысы қызметінен, ал 2013 жылы ҚХР Төрағасы қызметінен кетіп, бұл лауазымдарды Си Цзиньпинге тапсырды.
Дереккөздер: