Тортай Сәдуақасов (1954 жылы туған)
Тортай Сәдуақасов
Дереккөз: Әдебиет порталы
Тортай Қажыұлы Сәдуақасов 1954 жылы Көкшетау облысы (қазіргі Ақмола облысы) Кіндікқарағай ауылында дүниеге келген.
1977 жылы Қарағанды мемлекеттік университетінің (қазіргі академик Е.А. Бөкетов атындағы Қарағанды зерттеу университеті) филология факультетін бітірген. «Көкшетау правдасы» облыстық газетінде әдеби қызметкер (1971–1972), «Жазушы» баспасында редактор (1978–1979) болып жұмыс істеді.
70-ші жылдардың басынан бастап облыстық және республикалық басылымдарда ақын ретінде танылды. Орыс және моңғол ақындарының таңдамалы шығармалар жинағын аударуға қатысты. Александр Яшин (өнер және әдебиет саласындағы үздік еңбектері үшін Сталиндік сыйлықтың иегері, кеңестік орыс жазушысы), Владимир Павлинов (кеңестік орыс ақыны) және т.б. қаламгерлердің туындыларын қазақ тіліне аударды.
«Тұңғыш» (1978), «Жартастағы жаңғырық» (Эхо в скале, 1981), «Жұмбақтас» (1982), «Билеген қайыңдар»(Танцующие березы, 1986), «Айнакөл айшықтары» (1989) атты жыр жинақтарының авторы. Сондай-ақ, 2003 жылы жарық көрген «Ел мен жер» атты тарихи-танымдық кітаптың авторы.
Тортай Сәдуақасов өз шығармаларында табиғат пен адам арасындағы үйлесімді байланысты, қарапайым жандардың жарқын бейнесін, олардың арман-тілектері мен сезімдерін шебер суреттейді; сонымен қатар Отанының тарихын, қазақ халқының ерлігі мен бірлігін жырлайды.
2001 жылғы қаңтарда Л.Н. Гумилев атындағы Еуразия университетінде Тортай Сәдуақасовтың Қаскелең болысының мұрағаттық материалдарын зерттеу негізінде жазылған «Назарбай би және туған өлке тарихы» атты деректі кітабының тұсаукесері өтті. Шығарманың негізінде — ең қиын кезеңдердің өзінде сабырлылық пен сенімді сақтай білгені және көрегендігі үшін замандастары ерекше құрметтеген халық соты Назарбай Сапақұлы. Кітапта басты кейіпкердің өмірбаяндық деректерімен қатар, сол дәуірдің маңызды тарихи оқиғалары мен елеулі кезеңдері сипатталған. Атап айтқанда, кітап авторы Назарбай бидің астананы ежелгі Сарыарқа төріне көшіру туралы арманын оның шөбересі — Тәуелсіз Қазақстанның Тұңғыш Президенті Нұрсұлтан Назарбаев жүзеге асырғанын атап өтеді.
Дереккөздер: