Жозе Баррозу (1956 ж. туған)

Еурокомиссия Төрағасы Жозе Баррозу

Дереккөз: Spiegel баспасы

Жозе-Мануэл Дуран Баррозу 1956 жылы 23 наурызда Лиссабонда (Португалия) дүниеге келген. Ол студенттік жылдары Лиссабон университетінде заңгер және Женева университетінде саясаттанушы болып оқыған кезде саясатқа қызығушылық танытты.

1980 жылы ол Орталық-оңшыл социал-демократиялық партиясына қосылып, бес жылдан кейін социал-демократтар Үкіметінде бірінші жауапты лауазымға ие болды, СІМ-нің мемлекеттік хатшысы, содан кейін сыртқы істер министрі болды (1992-1995).

2002 жылы Португалияда коалициялық үкіметті басқарды, 2004 жылға дейін премьер-министр қызметін атқарды. 2003 жылы АҚШ пен Ұлыбританияның Иракқа басып кіруін қолдады.

2004 жылдың қарашасында Хосе Баррозу Еуропалық комиссияның (Еуропалық Одақтың Жоғарғы билік органы) төрағасы болды, бұл лауазымды 2014 жылға дейін екі мерзім бойы атқарды. Еуропалық комиссияның басында Еуропадағы интеграциялық процестерді күшейту, Еуропалық орталық банк пен басқа да еуропалық институттар негізінде еуроаймақ банктеріне бірыңғай қадағалау тетігін құру бағытын дәйекті түрде жүргізді.

Хосе Баррозу кезінде Еуропалық Одақтың құрамына 13 жаңа мүше кірді, 2007 жылдың желтоқсанында ЕО-ға кіретін барлық елдер Лиссабон келісіміне (ЕО Конституциясын ауыстырған және Одақтың басқару жүйесін реформалауды бастаған келісім) қол қойды. Экономикада ол ашық бәсекеге қабілетті нарықты дамытуды және протекционизмге қарсы тұруды, сондай-ақ ұлттық және еуропалық үкіметтердің ынтымақтастығын күшейтуді қолдады.

2014 жылы Украинадағы жағдайдың шиеленісу кезеңінде Еуропалық Одақ өкілдері мен Кеден одағы елдерінің (Ресей, Беларусь, Қазақстан) көшбасшыларының Украина президенті Петр Порошенкомен кездесуін ұйымдастырушылардың бірі болды. Кездесуді ұйымдастыруға Қазақстан Президенті Нұрсұлтан Назарбаев та белсенді қатысты – бастапқыда кездесуді Астанада өткізу жоспарланған болатын, бірақ кейіннен оны Минскіге (Беларусь астанасы) көшіру туралы шешім қабылданды. Кездесу 2014 жылғы 26 тамызда Минскіде өтті және жағдайды тұрақтандыруға ықпал етті.

ЕО үшін Лиссабон шарты қабылданғаннан кейінгі алғашқы шешім Еуроодақ пен Қазақстан арасындағы жаңа базалық келісімді әзірлеу болды.

2014 жылдың қазан айында Брюссельде Нұрсұлтан Назарбаев пен Жозе Баррозудың қатысуымен Қазақстан Республикасы мен Еуропалық Одақ арасындағы Кеңейтілген әріптестік пен ынтымақтастық жөніндегі келісім бойынша келіссөздерді аяқтау туралы хаттамаға, сондай-ақ елдің ДСҰ-ға кіруі шеңберінде Қазақстан мен ЕО арасындағы екіжақты келіссөздерді аяқтау туралы құжатқа қол қойылды.

ЕО-ға мүше барлық мемлекеттер мен Еуропалық Парламент ратификациялаған кеңейтілген әріптестік және ынтымақтастық туралы келісім 2020 жылғы 1 наурызда күшіне енді.

Жозе Баррозу екі рет - 2013 және 2019 жылдары - Қазақстанға ресми сапарлармен келді. «Нұрсұлтан Назарбаев бастаған Қазақстан Еуропалық Одақ үшін тек сауда-экономикалық алмасу саласында ғана емес, сонымен қатар өңірдегі бейбітшілік пен қауіпсіздікті ілгерілетуге қатысты маңызды серіктес және біздің ынтымақтастығымыз кеңеюде», — деп атап өтті Жозе Баррозу.

Нұрсұлтан Назарбаев Еуропалық Комиссияның төрағасы Жозе Мануэль Баррозумен кездесуде. 2019 жылғы қараша

Дереккөз: Қазақстан Республикасының Тұңғыш Президенті Нұрсұлтан Назарбаевтың ресми сайты