Ляньюньган порты
Ляньюньган порты – Қытайдың Цзянсу провинциясында орналасқан халықаралық теңіз порты, 1933 жылы салынған.
Ляньюньган портындағы контейнерлер және жүк кемелері
Дереккөз: Investing.com
Ляньюньган порты Қытайдағы ең ірі он порттың және әлемдегі аса ірі контейнерлік елу порттың қатарына кіреді. Портта мұнай-химия өнімдері, шикі мұнай, түрлі-түсті және қара металдар, темір кені, тыңайтқыштар мен астық ауыстырылып тиелетін ірі экспорттық-импорттық терминалдар орналасқан.
Ляньюньган порты
Дереккөз: Википедия
Порттың маңызды тораптарының бірі 2014 жылы "Белдеу мен жол" бастамасы аясында ашылған қытай-қазақ логистикалық терминалы болып табылады. Терминал арқылы Орталық Азиядан бидай, мақта-мата өнімдері, темір және тыңайтқыштар импортталады, Қытайдан автомобиль бөлшектері, жиһаз, электроника, құрылыс материалдары, киім және басқа да тауарлар экспортталады.
Ляньюньган қаласындағы Қытай-Қазақстан логистикалық базасы
Дереккөз: Труд
Терминалдың ауданы 220 мың шаршы метр құрайды, тиеу-түсіру қуаты 2023 жылғы жағдай бойынша – жылына 410 мың ЖФЭ (жиырма футтық эквивалент, контейнерлік тасымалдауға арналған жүк кемелерінің сыйымдылығын өлшеудің шартты бірлігін білдіреді). Терминал қазақстандық жүк жөнелтушілер мен жүк алушыларға ғана емес, сонымен қатар Орталық Азияның басқа елдерінен келген клиенттерге де қызмет көрсетіп, Орталық Азиядан экспортталатын металдар, ұн мен мақта-мата жіптерден бастап құрылыс материалдары мен автомобильдерге дейін тауарлардың кең номенклатурасын Қытай арқылы транзиттеуді қамтамасыз етеді. 2024 жылғы маусымда Корея – Қытай – Қазақстан – Өзбекстан жүк пойызының пилоттық бағыты іске қосылды.
Ляньюньган портында контейнерлерден жүк түсіру
Дереккөз: Женьминь жибао
Ляньюньган порты Жапониядан, Оңтүстік Кореядан, Вьетнамнан және Бразилиядан келген жүктерді (автомобиль, кондиционер, лифт, қант және кофе) Орталық Азия арқылы Еуропаға баратын пойыздарға қайта тиеуде маңызды рөл атқарады. Сонымен қатар, порт Сингапур, Индонезия, Үндістан, Кения, Египет, Түркия, Греция және Италиямен тұрақты жүк желілері арқылы байланысқан.
Ляньюньган кітапханасы тарту еткен тауарларды Қазақстан кітапханаларына жөнелту
Дереккөз: Женьминь жибао
2022 жылдың желтоқсанында Қытай-Қазақстан халықаралық логистикалық базасы Ляньюньган кітапханасы Қазақстандағы Алматы және Ақтау кітапханаларына сыйға тартқан 400-ден астам Қытай кітаптары мен мәдени тауарларын жөнелту арнайы тапсырмасын алды.
Дереккөздер: