Светлана Смирнова (1962 жылы туған)
Светлана Смирнова
Дереккөз: Ұлттық қатынастар саласы бойынша ресурстық орталық
Светлана Константиновна Смирнова 1962 жылғы 4 желтоқсанда Удмурт Автономиялы Кеңестік Социалистік Республикасының (қазіргі Удмурт Республикасы, Ресей) Дебёс ауданы, Заречная Медла ауылында туған. 1985 жылы Ижевск ауыл шаруашылығы институтын (қазіргі Ижевск мемлекеттік ауыл шаруашылығы академиясы) «Агрономия» мамандығы бойынша, кейінірек Ресей Федерациясы Үкіметі жанындағы Халық шаруашылығы академиясын, Ресей Федерациясы Сыртқы істер министрлігінің Дипломатиялық академиясын «Экономика» мамандығы бойынша және Георгий Плеханов атындағы Ресей экономикалық университетін бітірген. Ауыл шаруашылығы ғылымдарының кандидаты, саяси ғылымдардың докторы, профессор.
Еңбек жолын Ижевск ауыл шаруашылығы институтында Бүкілодақтық лениндік коммунистік жастар одағы (БЛКЖО) комитетінің хатшысы болып бастап, кейін Удмурт Республикасының жастар саясаты және ұлттар ісі жөніндегі органдарында түрлі қызметтер атқарған.
1991–1994 жылдары Ресей Федерациясы Жастар саясаты жөніндегі мемлекеттік комитеті төрағасының орынбасары, 1994–1999 жылдары Удмурт Республикасы Үкіметі жанындағы Ұлттар ісі жөніндегі комитеттің төрағасы болды.
1999 жылы Ресей Федерациясы Федералдық Жиналысы Мемлекеттік Думасының ІІІ шақырылымының депутаты болып сайланып, онда Ұлттар ісі жөніндегі комитет төрағасының орынбасары қызметін атқарды. ІV шақырылымдағы Мемлекеттік Думада ұлттық саясат және ұлтаралық қатынастар бағыттары бойынша жұмысын жалғастырды.
1990-жылдардың аяғынан бастап қызметі «Өмір үшін халықтардың бірлескен шығармашылығы» («Сенеж форумы») бүкілресейлік қоғамдық қозғалысымен байланысты болды, осы қозғалыс негізінде Ресей халықтары ассамблеясы құрылды. 2013 жылдың шілдесінен бастап Ресей халықтары ассамблеясы Кеңесінің төрағасы қызметіне кірісті.
2010-жылдары федералдық билік органдарында Удмурт Республикасының мүддесін білдірді; 2014 жылы Удмурт Республикасы басшысының Ресей Федерациясы Президенті жанындағы тұрақты өкілі — Удмурт Республикасы Үкіметі төрағасының орынбасары болып тағайындалды.
Халықаралық деңгейде «Еуразия халықтарының ассамблеясы» үкіметтік емес ұйымдарының халықаралық одағын құруға қатысты, бұл ұйым атауын 2025 жылы «Әлем халықтарының ассамблеясы» болып өзгертті. Ол осы ұйымда Бас кеңестің төрағасы және Бас хатшының бірінші орынбасары қызметін атқарады.
Светлана Смирнова Ресей Федерациясы Президентінің жанындағы Ұлтаралық қатынастар жөніндегі кеңестің құрамына кіреді. Ол ұлттық құрылыс, этносаралық қатынастар және жастар саясаты мәселелері бойынша ғылыми жарияланымдардың авторы әрі редакторы, сондай-ақ білім беру және ағартушылық жобалардың кураторы.
Дереккөздер:
Ресей халықтарының ассамблеясы