Бердібек Сапарбаев (1953-2023)
Бердібек Сапарбаев
Дереккөз: Nur.kz
Бердібек Мәшбекұлы Сапарбаев 1953 жылы 9 ақпанда Қазақ КСР-нің Қызылорда облысы, Жаңақорған ауданы, Бесарық ауылында дүниеге келген. 1977 жылы Алматы халық шаруашылығы институтын (қазіргі Нархоз университеті) «экономист» мамандығы бойынша бітірген, экономика ғылымдарының докторы. Еңбек жолын 1969 жылы Қызылорда облысы, Жаңақорған ауданындағы «Задаринский» совхозының (кеңестік шаруашылық, КСРО-дағы мемлекеттік ауыл шаруашылығы кәсіпорны) жұмысшысы болып бастаған. Кейін армия қатарында мерзімді әскери қызметін өтейді.
1977 жылдан 1988 жылға дейін Қазақ КСР Қаржы министрлігінде экономист, аға, жетекші және бас экономист, содан кейін бөлім бастығының орынбасары болып жұмыс істейді.
1988–1993 жылдары Қазақ КСР (кейіннен – Қазақстан Республикасы) Халыққа білім беру министрінің орынбасары қызметін атқарады.
1993 жылдан бастап Қазақстан Республикасы Президенті мен Министрлер Кабинеті Аппаратының қаржы, еңбек және халықты әлеуметтік қорғау бөлімі меңгерушісінің орынбасары және меңгерушісі, ал 1995 жылы Министрлер Кабинеті Аппаратының басшысы қызметтерін атқарды.
1995 жылғы қыркүйектен 1999 жылғы шілдеге дейін Қызылорда облысының әкімі болды.
1999 жылғы шілдеден 2002 жылғы тамызға дейін — Оңтүстік Қазақстан облысының (қазіргі Түркістан облысы) әкімі.
2002–2006 жылдары Қазақстан Республикасы Кедендік бақылау агенттігінің төрағасы, Қазақстан Республикасы Қаржы вице-министрі, Қаржы министрлігі Кедендік бақылау комитетінің төрағасы лауазымдарын атқарды.
2006 жылғы ақпаннан 2007 жылғы ақпанға дейін Қазақстан Республикасы Премьер-Министрі Кеңсесі Басшысының орынбасары — Үкіметтің Парламент Мәжілісіндегі өкілі, 2007 жылғы ақпаннан тамызға дейін Экономика және бюджеттік жоспарлау вице-министрі болды.
2007 жылғы тамыздан 2009 жылғы наурызға дейін Бердібек Сапарбаев Қазақстан Республикасының Еңбек және халықты әлеуметтік қорғау министрі қызметін атқарды.
2009 жылғы наурыздан 2014 жылғы қарашаға дейін Шығыс Қазақстан облысының әкімі болды.
2014 жылғы қарашада Қазақстан Республикасы Премьер-Министрінің орынбасары болып тағайындалып, бұл қызметті 2015 жылғы қыркүйекке дейін атқарды.
2015 жылғы қыркүйектен 2019 жылғы ақпанға дейін Ақтөбе облысының әкімі, 2019 жылғы 25 ақпаннан тамызға дейін қайтадан Қазақстан Республикасының Еңбек және халықты әлеуметтік қорғау министрлігін басқарды.
2019 жылғы тамызда Қазақстан Республикасы Премьер-Министрінің орынбасары болып тағайындалды.
2020 жылғы ақпаннан бастап Жамбыл облысының әкімі болып, онда 2022 жылғы сәуірге дейін жұмыс істеді.
2022–2023 жылдары «QazBioPharm» ұлттық холдингі» акционерлік қоғамының Директорлар кеңесінің төрағасы болды.
«Құрмет» (1999), «Парасат» (2007), І дәрежелі «Барыс» (2012) және «Отан» (2017) ордендерімен, сондай-ақ Қазақстан Республикасының бірқатар мерейтойлық медальдарымен және Ресей Федерациясының Достық орденімен марапатталған. Қызылорда, Шығыс Қазақстан және Ақтөбе облыстарының құрметті азаматы.
2023 жылы 10 маусымда дүниеден озды.
Дереккөздер:
«Қазақпарат» халықаралық ақпарат агенттігі