Заманбек Нұрқаділов (1944–2005)
Заманбек Нұрқаділов
Дереккөз: Nuz.kz
Заманбек Қалабайұлы Нұрқаділов 1944 жылы 15 қаңтарда Қазақ Кеңестік Социалистік Республикасының Алматы облысы, Кеген ауылында (қазіргі Қазақстан, Алматы облысы, Кеген ауданы, Кеген ауылы) дүниеге келген. 1961 жылы Алматыдағы Қазақ политехникалық институтына оқуға түседі. Институтты бітіргеннен кейін инженер-құрылысшы мамандығын алып шығады.
Еңбек жолын Алматы қаласы мен облысының құрылыс ұйымдарында бастаған. Ұзақ уақыт бойы «Қазселденқорғау» жүйесінде жұмыс істеді, 1966–1970 жылдары Медеудегі селге қарсы бөгеттің құрылысына және 1973 жылы Алматыдағы сел тасқынының салдарын жоюға қатысты.
1970-жылдардың соңында «Қазселденқорғауды» басқарды, кейін «Главалмаатастрой» басқармасының бастығы болды.
1985 жылдың қарашасынан 1991 жылға дейін Алматы қалалық халық депутаттары Кеңесі атқару комитетінің төрағасы қызметін атқарды.
1990 жылдың наурызында он екінші шақырылымдағы Қазақ КСР Жоғарғы Кеңесінің депутаты болып сайланады.
1991 жылы Алматы қалалық халық депутаттары Кеңесінің төрағасы және Қазақстан Коммунистік партиясы Алматы қалалық комитетінің бірінші хатшысы болады.
1992 жылғы 8 ақпаннан 1994 жылғы 20 маусымға дейін — Алматы қаласының әкімі.
1995–1997 жылдары — Қазақстан Республикасы Парламенті Мәжілісінің бірінші шақырылым депутаты.
1997 жылдың желтоқсанында Алматы облысының әкімі болып тағайындалып, бұл қызметті 2001 жылға дейін атқарды.
2001–2004 жылдары Қазақстан Республикасының Төтенше жағдайлар жөніндегі агенттігін басқарды.
2005 жылғы 12 қарашада Алматыдағы өз үйінде оқ жарақатымен өлі күйінде табылды.
Дереккөздер: