Texaco
Texaco логотипі
Дереккөз: Википедия
Texaco — XX ғасырдың соңында сату көлемі бойынша әлемдегі ең ірі мұнай компанияларының бірі болған америкалық мұнай корпорациясы. Компания қызметінің негізгі бағыттары шикі мұнай мен табиғи газды өндіру, өңдеу, маркетинг және тасымалдау болды. 2001 жылы Texaco-ны Chevron корпорациясы сатып алды, содан кейін ол Chevron құрылымында бренд және бөлімше ретінде жұмысын жалғастырды.
Бастапқыда компания Texas Fuel Company деп аталды. Компанияны 1901 жылы Техас штатында өнеркәсіпші Джозеф С. Каллинан мен қаржыгер Арнольд Шлает ашқан. Олардың жоспары Техаста мұнай сатып алып, оны өңдеп, Standard Oil компаниясына сату болды, бірақ көп ұзамай олар өз қызметін кеңейтіп, алып Спиндлтоп (Spindletop) кен орнында мұнай өндіре бастады.
1902 жылы компания Texas Company болып қайта құрылды, кейін қызметін кеңейте бастады. Жаңа кен орындарын игеріп, алдымен Техаста, кейін штаттан тыс жерлерде мұнай өңдеу зауыттарын салды.
Бірінші дүниежүзілік соғыстан кейін Texas Company шикі мұнайды өңдеудің алғашқы үздіксіз әдісін әзірлеп, патенттеді. Бұл әдіс мұнайды өңдеу кезінде алынатын бензиннің үлесін айтарлықтай арттыруға мүмкіндік берді.
1928 жылы Texaco компаниясы өз өнімдерін АҚШ-тың барлық штаттарында бірыңғай брендпен сатқан алғашқы америкалық мұнай компаниясы болды.
1930-жылдары Texas Company халықаралық экспансияны белсенді бастап, Канадада, Колумбияда және Венесуэлада мұнай өндіру мен өңдеуді дамытты, сондай-ақ Таяу Шығыс пен Индонезиядағы кәсіпорындардың тең иесіне айналды.
1959 жылы Texas Company ресми түрде Texaco болып өзгерді.
АҚШ-тағы Texaco желісінің жанармай бекеті
Дереккөз: Texaco сайты
Texaco компаниясы 1940-жылдардың ортасынан 1970-жылдарға дейін әлемдік мұнай өнеркәсібінде үстемдік құрған «жеті әпке-сіңлінің» бірі болды.
1984 жылы Texaco компаниясы «Getty Oil Company»-ды сатып алды, бірақ бұл мәміле «Pennzoil» компаниясымен соттасуға әкелді. «Pennzoil» «Getty Oil»-ды сатып алу туралы келісімнің өздерінде бұрыннан болғанын мәлімдеді. Сот нәтижесінде Texaco 3 миллиард доллар өтемақы төледі.
Getty компаниясын сатып алуға байланысты ұзаққа созылған құқықтық және қаржылық қиындықтар Texaco-ның ресурстарын тауысты. 2001 жылы америкалық Chevron компаниясының иелігіне өтпес бұрын, Texaco он жылдан астам уақыт бойы қайта құру мен стратегиялық қайта бағдарлау кезеңінен өтті.
Қазіргі уақытта Texaco — тұтынушыларға отын мен жағармай материалдарын сататын бренд әрі бизнес бағыты.
Қазақстанда Texaco 1997 жылдан бастап Қарашығанақ мұнай-газ конденсат кен орнын игеру жөніндегі консорциумға қатысты (2001 жылы компанияны сатып алу аясында оның үлесі Chevron-ға өтті).
Сонымен қатар, компанияның Қазақстанда жеке автожанармай құю станциялары болды. 1998 жылы Астанада алғашқы станцияның ашылуына Президент Нұрсұлтан Назарбаев қатысты. 2005 жылы Chevron Қазақстандағы АЖҚС желісін (соның ішінде Texaco заправкаларын) «ҚазМұнайГаз» мемлекеттік компаниясына сатты.
2025 жылы Texaco Қазақстанда «Texaco Lubricants» маркасымен май ауыстыру бойынша фирмалық сервистік орталықтар желісін ашты. Компания Орталық Азия өңірінде, соның ішінде негізгі нарық болып саналатын Қазақстанда дамуын жалғастыру ниетін мәлімдеді.
2025 жылы Астана қаласында Texaco желісінің алғашқы май ауыстыру пункті ашылды
Дереккөз: Linkedin
Дереккөздер: