Shinework Pictures
Shinework Pictures компаниясының логотипі
Дереккөз: Shinework Pictures компаниясының сайты
Shinework Pictures — 2000 жылы негізі қаланған, халықаралық киноөндіріске маманданған қытайлық медиа-компания. Кәсіпорын қызметінің басым бағыты — «Бір белдеу — бір жол» бастамасына мүше мемлекеттермен бірлескен жобаларды іске асыру. Компания Қытай Халық Республикасының мемлекеттік кино ведомстволарымен үйлесімді жұмыс істей отырып, трансұлттық кинотуындыларды жарыққа шығаруда. Оның өндірістік қоржынында Үндістанмен бірлескен «Кунг-фу йога» фильмі және Қазақстан мен Қытайдың кино саласындағы алғашқы копродукциясы (бірлескен жоба) — «Композитор» драмасы бар.
2016 жылы Shinework Pictures бірлескен киноөндірісті қолдау мақсатында бюджеті 10-нан 60 миллион АҚШ долларына дейінгі арнайы инвестициялық қор құрды. Компанияның стратегиялық мақсаты — мәдени және тілдік кедергілерді жою арқылы қытайлық кинематография өнімдерін жаһандық нарыққа интеграциялау.
Компанияның Қазақстанмен серіктестігі «Композитор» фильмі арқылы стратегиялық сипатқа ие болды. Туынды екінші дүниежүзілік соғыс кезеңінде Алматыда пана тауып, қазақ сазгері Бақытжан Байқадамовпен шығармашылық әрі адами достық орнатқан қытай композиторы Си Синхайдың өміріне арналған.
Жобаны іске асыруға 2015 жылы Қазақстан Республикасының Президенті Нұрсұлтан Назарбаев пен ҚХР Төрағасы Си Цзиньпин қол қойған мәдени-гуманитарлық ынтымақтастық туралы келісім негіз болды. Өндірістік үдерісті Ш. Айманов атындағы «Қазақфильм» киностудиясы мен Shinework Pictures компаниясы өзара келісім негізінде жүзеге асырды. Туындының негізгі түсірілім жұмыстары 2017 жылы Қазақстан аумағында өтіп, әлемдік премьерасы 2019 жылдың сәуірінде ІХ Бейжің халықаралық кинофестивалінің негізгі байқауы аясында таныстырылды.
Дереккөздер: