Philip Morris
Philip Morris International компаниясының логотипі
Дереккөз: Philip Morris International компаниясының сайты
Philip Morris International (PMI, «Филип Моррис Интернэшнл») — трансұлттық темекі компаниясы, әлемдегі ең ірі сигарет, темекі стиктері мен темекіні қыздырудың электронды жүйелерін өндірушілердің бірі.
Компанияның негізін 1847 жылы лондондық кәсіпкер Филип Моррис қалаған. Ол Бонд-стритте темекі мен сигарет сататын дүкен ашады. 1881 жылы оның ұлы Леопольд Моррис серіктесі Джозеф Грунебауммен бірге Philip Morris & Company and Grunebaum, Ltd. компаниясын құрады, ал 1885 жылы ол атауын Philip Morris & Co., Ltd. деп өзгертті. 1919 жылы компанияны америкалық тарап сатып алып, Вирджиния штатында Philip Morris & Co., Ltd, Inc. ретінде тіркеді.
1924 жылы Marlboro сигареттерін шығару басталды, ол 1972 жылы әлемдегі ең көп сатылатын маркаға айналды. 1954 жылы АҚШ-тан тыс жердегі алғашқы филиалы Австралияда ашылды, ал 1955 жылы алғашқы «қатты қорап» шығарылды. 2008 жылы Philip Morris International (PMI) Altria Group құрамынан бөлініп шығып, тәуелсіз компанияға айналды.
Бүгінде PMI 39 фабрикада өнім шығарады және оны 180-нен астам елде сатады. Ең танымал брендтерінің қатарында — Marlboro, Parliament, Bond, Chesterfield, L&M, Next, HEETS (IQOS жүйесіне арналған темекі стиктері) бар. 2014 жылдан бастап компания түтінсіз өнімдер бағытын белсенді дамытып келеді және 2030 жылға қарай табысының жартысын осындай тауарлардан алуды көздеп отыр.
Philip Morris International компаниясы Қазақстандағы алғашқы шетелдік инвестор болды. 1993 жылы компания Алматы темекі компаниясының (кейіннен — «Алматы темекі компаниясы» АҚ) акцияларын сатып алды. Бұл ТМД елдерінің темекі өндірісіне инвестиция салудың бес жылдық жоспарының бір бөлігі еді. Бүгінде «Филип Моррис Қазақстан» ЖШС халықаралық танымал маркалардың кең ассортиментін Қазақстанда сату үшін де, Орталық Азияның басқа елдеріне экспорттау үшін де өндіреді.
Дереккөздер: