Темірхан Досмұхамбетов (1949–2021)
Темірхан Досмұхамбетов
Дереккөз: Eldala.kz
Темірхан Мыңайдарұлы Досмұхамбетов 1949 жылғы 8 наурызда Қазақ КСР-і, Қостанай облысының Денисов ауданында (қазіргі Қазақстан Республикасы, Қостанай облысы) дүниеге келген. 1972 жылы Қазақ дене шынықтыру институтын (қазіргі Қазақ спорт және туризм академиясы) «дене шынықтыру және спорт оқытушысы» мамандығы бойынша, 1993 жылы әл-Фараби атындағы Қазақ ұлттық университетін «заңгер» мамандығы бойынша бітірген. 1996 жылы «Дене шынықтыру профиліне жатпайтын жоғары оқу орнындағы жоғары жетістіктер спортының педагогикалық және ұйымдастырушылық негіздері» тақырыбында диссертация қорғаған.
1973–1985 жылдар аралығында Қазақ мемлекеттік университетінде (қазіргі әл-Фараби атындағы Қазақ ұлттық университеті) оқытушылық қызмет атқарып, ассистент және бөлім меңгерушісі болды.
Бірқатар жоғары мемлекеттік лауазымдарды атқарды.
1998–2003 жылдары және 2004–2006 жылдары — Қазақстан Республикасы Президентінің Іс басқарушысы.
2003–2004 жылдары — Астана қаласының әкімі. 2006–2011 жылдары — Қазақстанның Туризм және спорт министрі.
2006–2015 жылдары Қазақстан Республикасы Ұлттық Олимпиада комитетінің президенті, атқарушы комитетінің мүшесі, ал 2008–2016 жылдары Су спорт түрлері федерациясының президенті болды.
Екінші дәрежелі «Барыс» орденімен, Ресейдің «Достық» орденімен және басқа де марапаттармен марапатталған. Астана қаласының құрметті азаматы, Қазақстанның және КСРО-ның еңбек сіңірген жаттықтырушысы, Қазақстанның еңбек сіңірген қайраткері.
2021 жылғы 1 қарашада өмірден озды.
Дереккөздер: