Альфред Гузенбауэр (1960 ж.т.)
Альфред Гузенбауэр
Дереккөз: Академик
Альфред Гузенбауэр 1960 жылғы 8 ақпанда Австрияның Санкт-Пёльтен қаласында дүниеге келген. 1978 жылы Визельбургтегі гимназияны бітіріп, Вена университетінің заң факультетіне оқуға түсті, онда саясаттану және философия салаларын зерттеді. 1987 жылы «Австриялық бейбітшілікті қорғау қозғалысы: қайраткерлері, құрылымы, 1980–1986 жылдар аралығындағы белсенділігі» деген тақырыпта докторлық диссертация қорғады.
1981 жылы Австрия Социалистік партиясына (1991 жылдан бастап — Австрия Социал-демократиялық партиясы, АСДП) мүше болып, саяси аренадағы қызметін белсенді бастады. 1984–1990 жылдары партияның жастар ұйымының (Австрияның Социалистік жастары) төрағасы, 1985–1989 жылдары Социалистік жастар интернационалының (100-ден астам елдің социалистік және социал-демократиялық жастар ұйымдарының бірлестігі) вице-президенті, 1989 жылы Социалистік интернационалдың (халықаралық социалистік және социал-демократиялық партиялар бірлестігі) вице-президенті болды.
1990-жылдары түрлі жергілікті партиялық ұйымдарды басқарды, 1991 жылдан бастап — Еуропа Кеңесі Парламенттік ассамблеясындағы (ЕКПА) Австрия делегациясының мүшесі, ЕКПА-ның әлеуметтік комитетінің төрағасы (1995–1998) қызметтерін атқарды.
2000 жылдан 2008 жылға дейін Австрия Социал-демократиялық партиясының төрағасы, Австрия парламентіндегі осы партия фракциясының жетекшісі (2000–2007) болды. 2007 жылдың қаңтарынан 2008 жылдың желтоқсанына дейін Австрияның Федералдық канцлері лауазымын атқарды.
Канцлер қызметінен кеткеннен кейін «Gusenbauer Projektentwicklung & Beteiligung GmbH» компаниясының негізін қалады. 2009 жылдан бастап WAZ-Mediengruppe медиа тобы жанындағы Шығыс Еуропа мәселелері бойынша кеңесші болып жұмыс істеді, түрлі ұйымдардың бақылау кеңестеріне мүше болды. 2000–2017 жылдары Карл Реннер институтының — АСДП саяси академиясының президенті болды.
2010 жылы Қазақстан Еуропадағы қауіпсіздік және ынтымақтастық ұйымының (ЕҚЫҰ) іс басындағы төрағасы болған кезде Альфред Гузенбауэр Қазақстан Республикасының Президенті Нұрсұлтан Назарбаевтың кеңесшілер тобына кірді.
Дереккөздер: