Франц Враницкий (1937 ж. т.)
Франц Враницкий
Дереккөз: Википедия
Франц Враницкий 1937 жылы 4 қазанда Австрияның астанасы Вена қаласында дүниеге келген. Оқу кезінде спорттық жарыстарға белсенді қатысып, баскетболдан Австрия құрамасының ойыншысы болды. 1960 жылы Вена экономика университетін тәмамдағаннан кейін еңбек жолын банк секторында бастады.
1984 жылы Австрияның Қаржы министрі болды, ал 1986 жылы Фред Зиновац (Австрияның 23-ші федералдық канцлері) отставкаға кеткеннен кейін федералдық канцлер лауазымына тағайындалды. Ол Австрияның еуропалық құрылымдарға интеграциялануын белсенді қолдап, елді дамытуға және оның халықаралық аренадағы позициясын нығайтуға бағытталған ауқымды реформалар жүргізді. 1995 жылы Австрияның Еуропалық Одаққа мүше болуына жағдай жасауда маңызды рөл атқарды.
1991 жылғы қазанда Қазақ КСР Президенті Нұрсұлтан Назарбаев Франц Враницкиймен кездесті. Кездесу Байқоңыр ғарыш айлағында, бортында австриялық ғарышкері бар ғарыш кемесінің ұшырылуына орай өтті. Бұл жүздесу Австрияның болашақ тәуелсіз мемлекетпен қарым-қатынасты нығайтуға мүдделілігін көрсетті. Осыдан кейін көп ұзамай, 1992 жылдың басында-ақ Австрия Қазақстанның тәуелсіздігін мойындау туралы шешім қабылдады.
Қазақстан мен Австрия арасындағы дипломатиялық қарым-қатынастар 1992 жылғы 19 ақпанда — 1991 жылғы желтоқсанда Қазақстан егемендік алғаннан кейін көп ұзамай ресми түрде орнатылды. 1993 жылғы ақпанда Нұрсұлтан Назарбаев Австрияға ресми сапармен барып, онда федералдық президент Томас Клестильмен және федералдық канцлер Франц Враницкиймен кездесулер өткізді. 1993 жылғы сәуірде Франц Враницкий Қазақстанға қарымта сапармен келді, оның барысында әуе қатынасы туралы үкіметаралық келісімге және Қарағанды металлургия комбинатын реконструкциялауға инвестиция салу туралы меморандумға қол қойылды.
Враницкийдің сыртқы саясаттағы басты жетістігі — 1994 жылғы сәтті референдумнан кейін келіссөздерді аяқтап, 1995 жылы Австрияның ЕО-ға мүшелігін қамтамасыз етуі болды. Ол қоғамды және өз партиясындағы күмәнданушыларды елдің ежелден келе жатқан бейтараптық саясатына қарамастан, ЕО-ға мүше болу қажеттігіне сендіре білді.
1997 жылы Франц Враницкий отставкаға кетіп, Албаниядағы Еуропадағы қауіпсіздік және ынтымақтастық ұйымы (ЕҚЫҰ) миссиясының басшысы ретінде халықаралық қызметке ден қойды. Өз қызметі үшін ол көптеген құрметті марапаттармен, соның ішінде Қазақстан Республикасының «Достық» орденімен марапатталды.
Дереккөздер: