Андрей Браун (1937 – 2022)
Андрей Браун
Дереккөз: Аграрный сектор
Андрей Георгиевич Браун 1937 жылы 14 ақпанда Украин КСР-і Чернигов облысы Бахмач ауданының Рундизия ауылында (кейіннен – Круглолуговка ауылы, қазіргі уақытта – Чернигов облысындағы жойылған ауыл) дүниеге келген. Ұлты – неміс. Әкесі – Георг Браун, колхозда ағаш ұстасы болып жұмыс істеген және 1936 жылы репрессияға ұшыраған.
1958 жылы Ақмола зооветеринарлық техникумын (қазіргі – Қазақ ұлттық аграрлық зерттеу университеті) бітіріп, кейіннен Сергей Киров атындағы Омбы ауыл шаруашылығы институтында (қазіргі – Петр Столыпин атындағы Омбы мемлекеттік аграрлық университеті) сырттай жоғары білім алған.
Еңбек жолын Целиноград (Ақмола) облысының совхоздарында зоотехник болып бастады. 1973 жылы Атбасар аудандық ауыл шаруашылығы басқармасының бастығы болды, кейін тоғыз жыл бойы Краснознаменск аудандық партия комитетін (райком) басқарды. Осы қызметтердегі табысты жұмысынан кейін, 1986 жылы Қазақстан Коммунистік партиясы Целиноград облыстық комитетінің (обком) бірінші хатшысы болып тағайындалады.
1986 жылдан 1997 жылға дейін Целиноград (кейіннен Ақмола атанды) облысын басқарды. 1994 жылы «Солтүстік Қазақстанның сүтті тұқымды ірі қара малының өнімділік қасиеттері мен биологиялық ерекшеліктері» тақырыбында кандидаттық диссертация қорғады.
1997 жылы, 60 жасында өз еркімен зейнетке шықты. 2022 жылғы 4 маусымда Байройт қаласында (Бавария, Германия) қайтыс болды.
«Балықшыға кеңестер» (авторлар ұжымымен бірге) және «Менің өмірім» кітаптарының авторы. 1991 жылы Социалистік Еңбек Ері атағына ие болған.
Дереккөздер: