Леонид Полежаев (1940 жылы туған)
Леонид Полежаев
Дереккөз: Глобал55.ру
Леонид Константинович Полежаев 1940 жылы 30 қаңтарда РСФСР Омбы облысының Исилькуль ауылында (қазіргі – Ресей Федерациясы) дүниеге келді. Мектепті бітіргеннен кейін Қазақ КСР-нің Петропавл қаласындағы техникалық училищеде оқыды (қазіргі - Қазақстан Республикасы), содан кейін 1959 жылдан бастап машина жасау зауытында ұста болып жұмыс істеді.
1965 жылы Омбы ауылшаруашылық институтын (қазіргі – Петр Столыпин атындағы Омбы мемлекеттік аграрлық университеті) инженер-гидротехник мамандығы бойынша бітірген. 1986 жылы Кеңес Одағы Коммунистік партиясының Орталық Комитеті (КОКП ОК) жанындағы Қоғамдық ғылымдар академиясында білім алды.
1960-1970 жылдары Павлодар «Целинкрайсуқұрылыс» тресінің прорабы, кейін Павлодар облыстық су шаруашылығы басқармасының бас инженері, облыстық ауыл шаруашылығы басқармасы бастығының орынбасары, «Ертісканалқұрылыс» және «Павлодарқұрылыс» тресттерін басқарды. 1976-1982 жылдары Ертіс - Қарағанды каналының құрылыс бастығы болды. 1982 жылдан бастап Қарағанды облыстық халық депутаттары Кеңесі атқару комитеті төрағасының бірінші орынбасары қызметін атқарды.
1987 жылдан бастап Ресейдің Омбы облысында жұмыс істеді. 1989 жылы облыстық атқару комитеті төрағасының орынбасары болып тағайындалды, кейін Омбы облыстық халық депутаттары Кеңесінің депутаты болып сайланды.
1991 жылдың қарашасында Омбы облысының бірінші губернаторы болып тағайындалды және 1991 жылдан 2012 жылға дейін 21 жылға жуық аймақты басқарды, губернаторлық мерзім бойынша рекордшылардың бірі болды. Осы уақыт ішінде ол екі рет аймақ басшысы болып қайта сайланды және Ресей Федерациясы Кеңесінің жұмысына қатысты. Ресей мен Қазақстан шекаралас аумақтары әкімшіліктері басшыларының консультациялық кеңесінің тең төрағасы болды.
2012 жылы губернатор қызметінен кеткеннен кейін Леонид Полежаев «Рухани мұра» аймақтық қоғамдық қорын басқарды. Еңбегі үшін бірнеше ордендер және медальдармен марапатталған, Федор Достоевский атындағы Омбы мемлекеттік университетінің және түрлі академиялардың құрметті профессоры және корреспондент мүшесі.
Кітап шығарушы және ағартушы ретінде танымал, Омбыда тарихи-мәдени жобалармен және баспа қызметімен белсенді айналысқан. Бірнеше кітаптың авторы, соның ішінде өмірбаяндық «Өмірдің екі өзені», «Менің жолым».
Леонид Полежаев өзінің кітаптарында және көпшілік алдында сөйлеген сөздерінде Қазақстанның Тұңғыш Президенті Нұрсұлтан Назарбаевтың жеке басына және қызметіне үнемі жоғары баға беріп отырды, ол Қазақстанда жұмыс істеген кезінде онымен тығыз байланыста болды. Нұрсұлтан Назарбаевтың 2019 жылғы наурызда отставкаға кету туралы шешіміне өзінің ойын тұжырымдай отырып, ол: «Уақыт мені өткен ғасырдың 70-ші жылдарына қайтарады. Нұрсұлтан Әбішұлы - Қарағанды металлургия комбинаты парткомының хатшысы, мен - Ертіс - Қарағанды каналы құрылысының жаңадан тағайындалған бастығымын; біз Кеңес елінің қуатты индустриалды аймағындағы құрдастармыз, батылдармыз, энтузиастармыз, жас тұлғалармыз, Қарағанды облыстық комитеті бюросының мүшелеріміз. Ресей жерінде әлі көрінбеген, бірақ қазірдің өзінде сезіліп тұрған тектоникалық өзгерістер уақыты. Партиялық және кеңестік органдардың қызметіне жаңа идеялар енгізу әрекеттері. Сол кездің өзінде Қарағандыда оның көшбасшысы, мемлекетші, интернационалист тұлғасының ауқымы сезілді»
Дереккөздер: