Константин Абаза (1841-1905)
Константин Абаза
Дереккөз: Википедия
Константин Константинович Абаза 1841 жылы 18 мамырда Ресей империясының Екатеринослав губерниясының Докторовкасында (қазіргі – Днепропетровск облысы, Украина) дворян отбасында дүниеге келді. 1859 жылы Петровский Полтава Кадет корпусын бітірді (балалар мен жасөспірімдерді әскери қызметке дайындайтын Ресей императорлық армиясының бастауыш әскери оқу орны), артиллерия офицері қызметін атқарды.
Кейін оқытуға ден қойды, әскери оқу орындарында жұмыс істеді, сауаттылықты оқыту әдістемесі бойынша дәрістер оқыды. «Әскерлердегі алғашқы оқуға арналған кітап» педагогикалық еңбектерінің авторы (1871, ағартушы-педагог Николай Столпянскиймен бірге), «Бастауыш әскери мектептерде оқыту жөніндегі Нұсқаулық» (1873), «Бастауыш әскери мектептерге арналған алфавит» (1883), «Сарбаздарға арналған арифметика» (1884), «Солдаттарды сауаттылыққа қалай үйрету керек – Нұсқаулық» (1887).
Әскери тарихты кеңінен насихаттайтын әскери-тарихи очерктер мен әңгімелердің авторы, соның ішінде солдаттардың оқуы үшін арналған кітаптар. Оның Казак әскерлеріне, орыс-жапон соғысының оқиғалары, әскери қайраткерлердің өмірбаяны туралы, Түркістанды жаулап алуға арналған жұмыстары белгілі («Түркістанды жаулап алу. Әскери тарихтың әңгімелері, жергілікті тұрғындардың табиғаты, өмірі мен әдет-ғұрыптары туралы очерктері»). «Родина», «Читальня народной школы» журналдарымен, «Русский инвалид», «Голос» газеттерімен жұмыс істеді, сондай-ақ кең оқырман қауымға әскери-тарихи хрестоматиялар шығарды.
1892 жылдан бастап полковник әскери атағымен отставкаға кетті.
1905 жылы 5 тамызда Ысмайыл қаласында қайтыс болды (Украинаның Одесса облысына кіреді).
Дереккөздер: