Еуропалық комиссия

Еуропалық комиссия (ЕК) — Еуропалық Одақтың қызметін үйлестіруге және ортақ саясатты қалыптастыруға жауапты жоғары атқарушы органы – Еуропалық комиссия (ЕК)  

Еуропалық Комиссияның логотипі 
Дереккөз: Alzheimer Europe   


Еуропалық комиссияның штаб-пәтері Брюссельдегі (Бельгия) «Берлемон» ғимаратында орналасқан, кеңселері мен департаменттері Брюссель мен Люксембургте, ал апта сайынғы отырыстары Брюссель мен Страсбургте (Франция) өтеді. 

«Берлемонт» ғимараты, Еуропалық комиссияның штаб-пәтері. Брюссель, Бельгия
Дереккөз: Википедиа  

Комиссия министрлер кабинеті ретінде жұмыс істейді және құрамына бейресми түрде комиссарлар деп аталатын 27 мүше кіреді. ЕО құрамына кіретін әрбір ел бір еурокомиссарды тағайындайды, алайда ЕК мүшелері оларды ұсынған мемлекеттің ұстанымын қорғамай, тұтастай Еуропалық Одақтың мүддесін білдіруге міндетті.
ЕК төрағасы – 27 комиссардың бірі, оны Еуропалық кеңестің (Одаққа мүше мемлекеттер мен үкімет басшыларынан тұратын ЕО-ның жоғары органы) ұсынысы бойынша Еуропалық Парламент (Еуроодақтың заң шығарушы органы) сайлайды. 2019 жылдың 1 желтоқсанынан бастап ЕК төрағасы қызметін Германия өкілі Урсула фон дер Ляйен атқарады (2024 жылдың шілдесінде қайта сайланған).
Еуропалық комиссияның міндеті – барлық ЕО елдерінің атқарушы билік органдарының жұмысын үйлестіру, айыппұл санкцияларын енгізуді қоса алғанда, жалпыеуропалық стандарттар мен нормалардың сақталуын бақылау, ЕО-ның бірыңғай саясатын әзірлеу және іске асыру.
Ресми түрде Еуропалық комиссия атқарушы билік тармағына жатады, бірақ оның жұмысы заң шығару саласымен тығыз байланысты. ЕК заң жобаларын әзірлейді және Еуроодақ бюджетін қалыптастырады, олар кейін Еуропарламент пен ЕО Кеңесі сияқты заң шығарушы органдарда қаралады. Еуропалық комиссияның барлық шешімдері ұсыныстық сипатқа ие, даулы мәселелер ұлттық үкіметтер деңгейінде шешіледі.
ЕК сондай-ақ дипломатиялық қызметті атқарады – Еуроодақ атынан халықаралық келісімдерге қол қояды және халықаралық ұйымдарда бірлестіктің атынан өкілдік етеді. Еуропалық комиссияның өкілдіктері 139 елде ашылған.
Қазақстан мен Еуроодақ арасындағы дипломатиялық қатынастар 1993 жылдың 2 ақпанында орнатылды. Сол жылдың желтоқсанында Брюссельде Қазақстан Республикасының Еуроодақтағы Өкілдігі ашылды. 1994 жылдың қарашасында Алматыда Еуропалық Одақтың Қазақстан Республикасындағы Өкілдігі жұмысын бастады (2007 жылы Астанаға ауыстырылды).

Дереккөздер: 
European Comission  
РБК